Путинни танқид қилган Z-блогер руҳий касалликлар шифохонасига жойлаштирилди

Навалний устидан аризалар ёзиб келган кремлпараст блогер кутилмаганда Путинни қаттиқ танқид қилди ва Украинадаги урушни “берк кўча” деб атади. Шундан сўнг, ОАВ маълумотларига кўра, Иля Ремесло руҳий касалликлар шифохонасига ётқизилган.

Фото: Видеодан кадр

Россияда шу ҳафта бошида президент Владимир Путинни кескин танқид қилган ҳукуматпараст блогер Иля Ремесло Санкт-Петербург шаҳридаги 3-сонли шаҳар руҳий касалликлар шифохонасига ётқизилди. Бу ҳақда 19 март, пайшанба куни аввал бошқа Z-блогерлар ёзди, кейин эса маълумотни Петербургдаги “Фонтанка” нашри тасдиқлади. Тиббиёт муассасасининг маълумот хизмати журналистларга шундай исм-фамилияга эга бемор ҳақиқатдан ҳам уларда эканини билдирган.

ОАВ маълумотларига кўра, 19 март эрталаб Ремесло, бир кун олдин фаол равишда интервюлар бериб турган бўлса-да, алоқага чиқмай қўйган ва бир неча соат давомида ижтимоий тармоқларда ҳам кўринмаган.
“Фонтанка” қайд этишича, кремлпараст блогер ётган бўлим рақамига қараганда, у олдин руҳшунослар назарига тушмаган. Интернетда шунингдек, Ремеслонинг синглиси Санкт-Петербургда таниқли психиатр шифокор эканига ҳам эътибор қаратилган.
Иля Ремесло — Россия Жамоат палатасининг собиқ аъзоси, ҳуқуқшунос. У ўз блогида ҳозиргача Россия раҳбариятини фаол қўллаб-қувватлаб, мухолифатни танқид қилиб келган. Бундан ташқари, Ремесло Алексей Навалний ва унинг сафдошлари устидан бир нечта ариза ёзган. Хусусан, ушбу Z-блогер ФБК хайрия маблағлари билан гўёки “фирибгарлик” қилингани ҳақидаги ишда сезиларли рол ўйнаган.
17 март кечқурун ва 18 март эрталаб Ремесло кутилмаганда Кремл сиёсатини кескин танқид қилувчи бир қатор постлар эълон қилди. Жумладан, блогер Украинадаги урушни “берк кўча” деб атади ва Владимир Путинни “легитим бўлмаган президент” сифатида суд қилишга чақирди. Бу баёнотлар Z-муҳитда катта шов-шувга сабаб бўлди. Масалан, чечен махсус кучлари раҳбари Апти Алаудинов Ремесло ҳокимиятни “мамлакат учун энг оғир паллалардан бирида” ўзининг “обуначилар ва сохта шуҳрат ортидан қувиши” сабаб танқид қилганини ёзди. Шунингдек, Ремесло аккаунти бузиб кирилган бўлиши мумкин, деган тахминлар ҳам билдирилди, аммо блогернинг ўзи 18 март куни буни рад этди.

18 март куни Ремесло билан интервю ёзиб олган журналист Александр Плюшчев шундай фикр билдирди: агар кремлпараст блогернинг шифохонага ётқизилгани ҳақидаги маълумот тасдиқланса, бу Россия ҳокимияти учун “энг самарали инқироз-менежменти” бўлади.