Сўнгги йилларда Хоразм вилоятида, айниқса Урганч шаҳрида, тунги клублар, “лоунге бар”лар, караоке номи остидаги масканлар сони тез суръатларда кўпаймоқда. Аммо бу кўринишда тадбиркорлик сифатида эътироф этилаётган жойларда аслида нима бўлаётгани ҳақида жамоатчилик ўйлаб кўраяптими?

Тадбиркорлик ниқобидаги ахлоқсизликми?

Кўп ҳолларда “дам олиш маскани”, “овқатланиш шаҳобчаси”, “клуб” деб очилган бу жойлар тунги пайтларда мусиқаси баланд, ичкиликбозлик ва маънавияцизлик манзилларига айланмоқда. Кимдир буни “бизнес” дейди. Аммо савол туғилади:
Бу қандай бизнески, кеч соат 2–3 гача фоҳиша кийимидаги аёллар эркин юради, эркаклар маст ҳолда уларни кузатиб юради?

Жамоатчилик нега жим? Масъуллар қаерда?

Маҳалла, ички ишлар, прокуратура, ҳокимлик – бу муассасалар бунга кўз юммоқдами ёки назоратни йўқотганми? Тунги клубларнинг ҳар бири оддий одам кўз ўнгида қандай ишлаётгани аён – демак, мутасаддилар ҳам бундан бехабар эмас.

Шундай экан, савол:
 • Бу жойлар кимнинг “кришаси” остида ишламоқда?
 • Нега тунги клуб очишга руҳсат олиш осон, лекин китоб дўкони ёки спорт зал очишга минг тўсиқ қўйилади?
 • ОАВда аҳлоқ, оила, маданият ҳақида гапирилади-ю, аммо реал ҳаётда зинокорлик кенг йўлга қўйилган бўлса, бу иккиюзламачилик эмасми?

Инстаграмда “реклама”, жамиятда фожиа

Ёшлар орасида кенг тарқалаётган бошқа бир иллат – бу Инстаграм саҳифаларида ушбу жойларнинг очиқча реклама қилиниши. Рақс тушаётган, маст бўлаётган қизлар, уларни зўр деб кўрсатаётган блоггерлар, бу орқали обрў топаётган, ахлоқни эса йўқотаётган ижтимоий муҳит.

Нега бу саҳифалар очиқча ишлаяпти?
Нега ахлоққа зид контентга қонуний чора кўрилмаяпти?
Ахборот ва маданият вазирлиги, Ёшлар ишлари агентлиги – сизлар қаерда?

Бу йўл қаерга олиб боради?

Тунги клубларнинг кўпайиши, очиқ реклама, бефарқлик – буларнинг барчаси эртага катта авлодни маънавий ҳалокатга олиб келади. Бу шунчаки “фойда” эмас – бу жамият асоси бўлган оила, ор-номус, виждон йўқотилишидир.

Бугун жим турган раҳбарлар – эртага бу ёшлардан нимани кутади?