УРГАНЧ ДАВЛАТ УНИВЕРСИТЕТИДА УСТОЗ ВА МУРАББИЙЛАР КУНИ КЕНГ НИШОНЛАНДИ

Устозга эҳтиром — илмга эҳтиром, устозга ҳурмат — келажакка ҳурматдир.

Бугун Урганч давлат университетида 1 октябрь — Ўқитувчи ва мураббийлар куни муносабати билан профессор-ўқитувчилар ва мураббийларга юксак эҳтиром ифодаси сифатида тантанали байрам тадбири ўтказилди.

Тадбирни университет ректори Феруза Мадрахимова очиб берди. У ўз сўзида университетнинг илмий-маърифий салоҳиятини юксалтириш, ёш авлодга сифатли таълим бериш ва уларни муносиб инсонлар этиб тарбиялашда устозларнинг беқиёс ўрнини алоҳида таъкидлади.

Шунингдек, тадбирда Хоразм вилояти ҳокими ўринбосари Шерзод Бердиев ҳамда Хоразм вилояти прокурори ўринбосари Худайберди Норқобилов иштирок этиб, университет профессор-ўқитувчилари ва мураббийларини касб байрами билан самимий муборакбод этдилар.

Меҳмонлар устозларга шарафли ва масъулиятли фаолиятида куч-ғайрат, мустаҳкам соғлик, оилавий хотиржамлик ва янги зафарлар тиладилар.

УСТОЗЛАР МЕҲНАТИ ЭЪТИРОФ ЭТИЛДИ
Байрам тадбири доирасида бир гуруҳ университет профессор-ўқитувчиларига «Олий таълим аълочиси» кўкрак нишони тантанали равишда топширилди.

Шунингдек, бир қатор профессор-ўқитувчилар Олий таълим, фан ва инновациялар вазири Қўнғиротбой Шариповнинг Фахрий ёрлиғи билан тақдирландилар.
Бу каби эътирофлар таълим соҳасида кўп йиллар давомида самарали меҳнат қилиб, ёш авлод камолотига муносиб ҳисса қўшаётган устозларнинг фидокорона меҳнатига берилган муносиб баҳодир.

БАЙРАМ ТАДБИРИ КЎТАРИНКИ КАЙФИЯТДА ЎТДИ
Тантанали тадбирнинг бадиий қисми ҳам байрамона руҳда ташкил этилди.

Унда эл суйган таниқли санъаткорлар — Ўзбекистон халқ ҳофизи, профессор Очилбек Матчанов, «Шуҳрат» медали соҳибаси Хуршида Эшниёзова, «Шуҳрат» медали соҳиблари Улуғбек Бобожонов, хонанда Ҳилола Бобожонова, шунингдек, университет Санъат кафедрасининг истеъдодли профессор-ўқитувчилари иштирок этдилар.

Ижро этилган дилбар куй-қўшиқлар, рақслар ва санъат намуналари устозлар учун ташкил этилган байрамга янада кўтаринки кайфият ва ўзига хос файз бағишлади.

Умуман, Урганч давлат университетидаги тадбир устоз ва мураббийларнинг жамиятдаги юксак мақоми, уларнинг ёш авлод тарбияси ва мамлакат тараққиётидаги муҳим ўрни яна бир бор намоён этилган байрам сифатида ўтди.

Зеро, устозга эҳтиром — илмга эҳтиром, илмга эҳтиром эса келажакка эҳтиромдир.