ШОВОТДАГИ 48-СОН МАКТАБ БЎЙИЧА РАСМИЙ МУНОСАБАТ ЭЪЛОН ҚИЛИНДИ

Ижтимоий тармоқларда тарқалган “Шовотдаги 48-сон мактаб қурилиш тугалланмасдан очилган” мазмунидаги хабарлар юзасидан тегишли ташкилотлар расмий муносабат билдирди.

МАКТАБ ТАРИХИ ВА ЯНГИЛАНИШ ЖАРАЁНИ

Маълумотларга кўра, Шовот тумани Гулистон маҳалласидан жой олган 48-сон умумий ўрта таълим мактаби илк бор 1991 йилда 240 ўринли қилиб қурилган ва 1992 йилда фойдаланишга топширилган. Кейинчалик, 2008 йилда “Мактab таълимини ривожлантириш дастури” доирасида жорий таъмирлаш ишлари амалга оширилган.

Ўзбекистон Республикаси Президентининг PQ–454-сонли қарорига мувофиқ, мазкур таълим муассасасини “Инвестиция дастури” доирасида янгидан қуриш белгиланиб, 2025 йил июнь ойида “Ҳазорасп строй сервис” МЧЖ томонидан қурилиш-таъмирлаш ишлари бошланган.

ЗАМОНАВИЙ 3 ҚАВАТЛИ МАКТАБ БАРПО ЭТИЛДИ

Лойиҳа доирасида 540 ўринли, барча қулайликларга эга 3 қаватли замонавий мактаб биноси қурилди. Янги бино 29 сентябр куни фойдаланишга қабул қилиниб, ҳозирда 510 нафар ўқувчи 1 навбатда таълим олмоқда.

Синф хоналари стол, стул, доска, шкафлар ва ўқув воситалари билан тўлиқ жиҳозланган.

ҚУРИЛИШ ИШЛАРИ РЕЖА АСОСИДА ДАВОМ ЭТМОҚДА

Расмий маълумотда қайд этилишича, ҳозирги вақтда иссиқлик тизими, канализация тозалаш ускунаси, сув таъминоти ва электр трансформатори ўрнатиш ишлари режа асосида босқичма-босқич амалга оширилмоқда.

Бу ишлар ўқув жараёнига ҳеч қандай тўсиқ бўлаётгани йўқ ва мактаб фаолиятини тўлиқ таъминлаш учун техник жиҳатдан қўшимча ишлар олиб борилмоқда.

 МУТАСАДДИЛАР ТАЪКИДЛАЙДИЛАР

Таълим соҳаси ва маҳаллий ҳокимият вакиллари таъкидлашича, янги бино ишга туширилган бўлса-да, айрим ёрдамчи иншоотлар — иссиқлик қувурлари ва электр трансформатори каби тизимлар синов босқичида.

— “Бу ишлар ўқув жараёнига таъсир қилмаяпти. Болалар хавфсиз ва қулай муҳитда таълим оляпти”, — дейилади расмий ахборотда.

Шовотдаги 48-сон мактаб ҳақидаги хабарлар бўйича маълум бўлишича, таълим жараёни ҳақиқатан ҳам янги бинода бошланган, аммо қурилиш ишлари режа асосида босқичма-босқич якунланмоқда.

Ҳозирча ўқув жараёни барқарор ва хавфсиз бўлиб, барча техник тизимлар тўлиқ ишга туширилгандан сўнг объект расман тўлиқ фойдаланишга қабул қилинади.