Хоразмда блогерлар жанжали авжида: ахборот майдони майнавозчилик саҳнасига айланмоқда

Сўнгги кунларда ижтимоий тармоқларда, айниқса Хоразмдаги блогерлар орасида “жанжал”лар, ўзаро таҳдид ва тўқнашувлар сони кескин ошди. Бир-бирини “фош этиш”, “ҳақиқатни гапириш” баҳонасидаги чиқишлар жамоатчилик томонидан мароқ билан кузатилмоқда.

Бироқ бу ҳолатнинг мазмунига қарасак, гаплар кўп, мазмун кам — кўчадаги болалар уришига ўхшаш тортишувлар, фақат оғзаки таҳдид ва “лайк” ортидан қувиш.

“Жанжал контент” — янги трендми?

Баъзи блогерлар аудитория эътиборини олиш учун жамиятдаги ҳақиқий муаммоларни эмас, балки шахсий адоват ва бўҳтонни айлантирмоқда. Бу ҳолатда энг кўп “ютувчи” — лайк ва қарашлар, аммо энг кўп “ютқазувчи” — жамоатчиликнинг ишончи.

“Нега расман ИИБга мурожаат қилинмайди?” деган савол жойида. Агар ҳақиқий таҳдид ёки туҳмат бўлса — ҳуқуқий йўл очиқ. Лекин кўпчилик “пост” ва “сторилар” орқали кўпроқ одам кўришини хоҳлайди, чунки ижтимоий тармоқда сенсация — тез оммалашишнинг энг қисқа йўли.

 Ахборот воситалари қайда қолди?

Бугун айрим блогерлар ўзини ОАВдек тутаяпти, лекин уларнинг ёндашуви — журналистиканики эмас. ОАВ далилга таянади, текширади, икки томонни эшитади. Блогер эса кўпинча ҳиссиётга берилади, шахсий муносабатни “контент”га айлантиради.

Агар ҳақиқий журналистика сукут сақласа, майдонни “лайк учун яшовчи”лар эгаллайди. Демак, Хоразмда ахборот майдонидаги бўшлиқни майнавозчилик тўлдира бошлади.

 “Қозон очилди” — энди ҳар нарса мумкин

Эндиликда турли “жанжал контентлар”нинг давоми бўлади — чунки қозон очилди. Ижтимоий тармоқ назоратсиз, ахборот этикаси эса заиф.

Бу ҳолат ҳақиқий муаммоларни — ишсизлик, таълим, экология, йўл ва транспорт, соғлиқни сақлаш каби долзарб мавзуларни сояга туширмоқда.

Хоразмда ахборот майдонини майнавозчилик эмас, факт ва масъулият белгилаши керак.
Таҳдид эмас — далил; сенсация эмас — салоҳият; жанжал эмас — жавобгарлик муҳим бўлган вақт келди.