Урганчда “чала ишлар” давом этмоқда

Паҳлавон Маҳмуд — “Лучевой” кўчасидаги очиқ хавф.

Урганч шаҳрида айрим коммунал ва пудрат ташкилотларининг иш юритиш маданияти аҳоли орасида кескин норозиликка сабаб бўлмоқда. Бунинг навбатдаги мисоли Паҳлавон Маҳмуд кўчаси (халқ тилида “Лучевой”)да кузатилди.

Қувур қўйилди, аммо иш ярим ҳолда қолдирилди

2–3 кун аввал ушбу кўчадан оқова сув қувури ўтказилди. Ер ковланди, қувур ётқизилди, аммо иш якунига етказилмади. Ковланган жой устидан фақатгина тош ташлаб қўйилган, холос.

На ўша жойда хавф ҳақида огоҳлантирувчи йўл белгиси бор, на махсус тасма, на ҳайдовчи ва пиёдалар учун қандайдир белгилар.

Бу эса фақат ноқулайлик эмас — очиқ хавф манбаи.

Йўл ҳаракати хавфсизлигига эътибор қани?

“Лучевой” кўчасида аввал ҳам бир нечта ЙТҲлар қайд этилгани маҳаллий аҳолига яхши маълум. Ёмғирли кунлари ёки кечки пайт ковланган жойни кўриш янада қийин бўлади. Бир лаҳзада ҳайдовчи чуқурга тушиб кетиши мумкин.

Шундай ҳолатда ишни амалга оширган масъуллар томонидан хавфсизлик чоралари кўрилмагани — масъулиятсизликнинг очиқ кўриниши.

Бу — оддий беэътиборлик эмас, тизимли муаммо

Аҳоли орасида “ишни бошлашади, лекин тугатишмайди” деган фикрлар кўпайган. Баъзи пудратчилар ишни муддатга амал қилмасдан, назоратсиз тарзда олиб бораётгани сезилади. Сабаблари номаълум:

— назорат етишмаслиги жумудир?
— ёки масъул ходимлар ўз вазифасини пухта бажармаяптими?

Қандай бўлмасин, бундай иш усулини бир сўз билан таърифлаш мумкин:
совуққонлик ва ўз ишига эътиборсизлик.

Меъёр ва қоидалар бор – аммо улар бажарилмаяпти

Қонун ва меъёрларга кўра:

• ковланган ҳар бир йўл қисми белгилар билан ўраб қўйилиши шарт;
• хавфли жойлар кечаси ёритилиши лозим;
• иш тугалланмаган бўлса ҳам, вақтинчалик хавфсизлик чоралари жойига қўйилиши керак.

Аммо амалда бундай тартиб кўп ҳолларда бажарилмаяпти.

Аҳоли адолат талаб қилмоқда

Паҳлавон Маҳмуд (“Лучевой”) кўчасидаги ҳолат — битта кўчанинг муаммоси эмас, балки тизимдаги умумий масаланинг бир бўлаги.

Аҳоли қонуний равишда талаб қилмоқда:
— ишни бошлаган ташкилот уни хавфсиз ҳолда қолдирсин;
— йўл белгиларини ўрнатиш ва назорат қилиш масъул идоралар зиммасида эканини унутмасин;
— “чала ишлар” амалиёти тўхтатилсин.

Шаҳар инфратузилмасини янгилаш — бу фақат қувур ётқизиш ёки ер ковлаш эмас. Бу, энг аввало, фуқаролар учун хавфсиз муҳит яратиш демакдир. Агар ташкилотлар ишни ярим қолдирса, бу на фақат бесамарлик, балки одамлар ҳаёти учун жиддий таҳдиддир.

Ушбу ҳолат тегишли идоралар томонидан ўрганилиши ва тезкор равишда бартараф этилиши лозим. Чунки бу кўчадан ҳар куни юзлаб одамлар ҳаракатланади ва хавф ҳозирнинг ўзида мавжуд.