Пиёдалар хавфсизлиги: Урганчда йўл чизиқларини янгилаш вақти келмадими?

Урганч шаҳри ва Урганч туманининг айрим ҳудудларида пиёдалар ўтиш жойларидаги йўл чизиқлари деярли кўринмай қолгани аҳоли ўртасида жиддий саволларни туғдирмоқда. Йўл ҳаракати хавфсизлигини таъминлашда муҳим аҳамиятга эга бўлган бундай белгиларнинг йўқолиб кетиши ёки хиралашиб қолиши пиёдалар учун ҳам, ҳайдовчилар учун ҳам хавфли вазиятларни юзага келтирмоқда.

Айниқса, Урганч туманидаги Жайҳун кўчасидаги пиёдалар ўтиш йўлагини мисол сифатида келтириш мумкин. Бу ердаги йўл чизиқлари шунчалик хиралашганки, деярли кўринмайди. Натижада кўплаб ҳайдовчилар ушбу жойда пиёдалар ўтиш йўлаги борлигини сезмайди ёки эътибор бермайди. Пиёдалар эса йўлдан ўтиш учун бир неча дақиқа кутиб туришга, баъзан эса хавотир ва қўрқув билан ҳаракатланишга мажбур бўлмоқда.

Аслида пиёдалар ўтиш жойлари — йўл ҳаракати хавфсизлигининг энг асосий элементларидан бири. Йўл чизиқларининг аниқ ва равшан чизилиши нафақат тартибни таъминлайди, балки эҳтимолий йўл-транспорт ҳодисаларининг олдини олишга ҳам хизмат қилади. Шу боис, бундай белгиларнинг мунтазам равишда янгиланиб туриши муҳим вазифалардан ҳисобланади.

Шу ўринда савол туғилади: нима учун йўл чизиқлари асосан марказий кўчалардагина янгиланади? Қолган кўчалардаги пиёдалар хавфсизлиги камроқ аҳамиятга эгами? Ахир инсон ҳаёти ва хавфсизлиги шаҳар маркази ёки чекка ҳудудга қараб фарқ қилмаслиги керак.

Мутахассислар таъкидлашича, баҳор мавсуми йўл инфратузилмасини тартибга келтириш, жумладан йўл чизиқларини қайта чизиш учун энг қулай давр ҳисобланади. Шу нуқтаи назардан қараганда, мутасадди ташкилотлар барча ҳудудлардаги пиёдалар ўтиш жойларини кўздан кечириб, зарур жойларда чизиқларни янгилаши мақсадга мувофиқ бўлар эди.

Жамоатчилик эса оддий бир ҳақиқатни эслатмоқда: пиёдалар хавфсизлиги — ҳар қандай инфратузилманинг энг муҳим қисми. Чунки ҳар бир пиёда — бу аввало инсон. Инсон манфаати эса ҳар қандай қарор ва ташаббуснинг биринчи ўрнида туриши керак.