Месси Аргентинадаги сўнгги ўйинини ўтказди

Кеча, 4 сентябрь куни Аргентинанинг Estadio Mâs Monumental стадионида бўлиб ўтган бахсда Аргинтина Венесуэла устидан 3:0 ҳисобида ғалаба қозонди. Унда Лионель Месси Аргентина терма жамоасидаги сўнгги ўйинини ўтказди ва дубль қайд этиб, учрашувнинг энг яхши футболчиси сифатида майдондан чиқди. Бу ўйин билан у нафақат мухлисларига, балки ўзи туғилиб ўсган мамлакат тимсолига ҳам рамзий хайрлашув қилди. Бу ҳақда “Reuters” хабар берди.

Месси Аргентинага 2005 йилдан буён хизмат қилиб келмоқда ва шу давр ичида терма жамоа тарихидаги энг йирик ютуқларга ҳисса қўшди. У 181 та ўйинда майдонга тушиб, 106 та гол урди ва 56 та голли узатма берди. 2021 йилда у терма жамоа билан ниҳоят Копа Америкада зафар қучди, 2022 йилда эса Қатар мундиалида Аргентина 36 йилдан кейин дунё чемпиони бўлишига бош-қош бўлди. Шу билан бирга, 2022 йилда Финалиссима мусобақасида ҳам ғалаба қозониб, миллий жамоанинг олтин даврини яратди.

Мессининг терма жамоадан кетиши сабаблари бир нечта омиллар билан изоҳланади. Биринчидан, у 37 ёшга кириб, жисмоний ҳолати аввалги каби юқори даражада эмаслиги сезила бошлади. Иккинчидан, у ўзининг халқаро футбол тарихидаги энг катта марраларга эришганини, энди ёшларга имконият бериш вақти келганини таъкидлаб келмоқда. У ўзи ҳам интервьюларида "ҳамма нарсага эришдим" деган фикрни очиқ айтган. Учинчидан, клуб фаолиятига кўпроқ эътибор қаратиш, жароҳатлардан эҳтиёт бўлиш ва футболни профессионал даражада чиройли якунлаш истаги ҳам муҳим роль ўйнайди.

Мессининг қарори футбол оламида катта резонанс уйғотди. Баъзи мутахассислар ва собиқ футболчилар уни "энг олий чўққида турганида кетгани учун" мақташди, бу орқали у абадий ёрқин хотира қолдирганини таъкидлашди.

Айримлар эса Мессининг ҳали ҳам терма жамоага фойда келтира олишига ишонган ҳолда, кетишини эрта деб ҳисобламоқда. Мухлислар орасида эса қарама-қарши фикрлар мавжуд бўлса-да, кўпчилик уни барча даврларнинг энг буюк футболчиси сифатида кузатмоқда.

Мессининг Аргентина терма жамоаси билан йўли футбол тарихидаги энг улкан ҳикоялардан бири сифатида қолди. У бир пайтлар марҳум Диего Марадонага қиёс қилиниб, катта босим остида фаолият бошлаган бўлса, якунда ўз даврининг энг буюк футболчисига айланди. Шу билан у нафақат Аргентина, балки бутун футбол тарихига абадий ном қолдирди.