Олов тез, ёрдам секин — системада ёнғин бор!

Хоразм вилояти, май 2025 — Урганч тумани, Анжирчи маҳалласида содир бўлган навбатдаги ёнғин яна бир бор ҳудудимизда фавқулодда ҳолатларга жавоб бериш тизимидаги етишмовчиликларни фош қилди. Уй ёнаётган бир пайтда ёнғин ўчирувчи машина ишламай қолди — бу бирор кимнинг шахсий айби эмас, балки бутун тизимдаги муаммонинг яққол ифодаси.

Гувоҳларнинг сўзларига кўра, фавқулодда ҳолатлар хизмати ўз вақтида етиб келган. Бироқ автоцистернадан сув чиқмаган. Одамлар ўз уйини ташлаб, қўшнилар кўмагида ёнғинни ўчиришга ҳаракат қилган, аммо орқадаги турар жойлар сезиларли зарар кўрган.

Бу биринчи марта эмас. Шундан икки кун аввал Боғот туманида юз берган ЙТҲ (йўл-транспорт ҳодисаси)да ҳам фуқаролар тезкор ёрдамга кеч етиб келинганини таъкидлашган. Ушбу ҳолатларда ҳам аниқ бир нуқтада – ёзилмаган, аммо яшаб турган ҳақиқатда – тизим самарасизлиги намоён бўлди.

Муаммо – техникадими, тизимдами?

Бу каби воқеаларга қараганда, муаммо фақат автоцистернада ёки бир ҳайдовчининг масъулиятида эмас. Масала янада кенгроқ ва чуқурроқ:
 • Автомашиналар эски, вақтинча “ямалиб” юрган,
 • Назорат механизми суст,
 • Ҳақиқатни ёритган ОАВ эса “ҳассос ташкилотлар” учун ноқулай.

Биз, маҳаллий ОАВ сифатида, ушбу камчиликларни кўрсатсак, аксар ҳолда унга жавоб йўқ. Жимлик — самарали фаолият эмас. ОАВ фикри инкор қилинса, фақатгина жамоатчилик ишончи емирилади.

Танқид душманлик эмас

Айрим ташкилотлар журналистик танқидни “шахсий ҳужум” деб қабул қилишади. Лекин, ҳақиқат шундаки — ҳар бир конструктив танқид ўз вақтида қабул қилинса, у тизимни қутқаради. Жамоатчилик ишончини тиклайди. Янги автомобиллар керакми? Ҳа. Янги ёндашув ҳам зарур. Одам ҳаётини сақлаб қолиш учун эски ўйин қоидалари билан ўйнаб бўлмайди.

Нима қилиш керак?

 • Аввало, фавқулодда вазиятлар хизмати автопарки тўлиқ текширилиши, носоз техника ишдан чиқарилиши лозим.
 • Ҳар бир туман бўйича оператив жавоб бериш режаси қайта кўриб чиқилиши керак.
 • Ва, энг муҳими — ОАВ фикрига қулоқ тутиш маданияти шаклланиши шарт.


Бу сатрлар шаъний эмас, жамоат хавфсизлиги учун ёзилди. Агар танқид сизга оғриқли туюлса, ўйланинг — фуқаро учун ёнғинда куйган уй ёки вақтинча олиб ташланган тадбирлар қайси оғирроқ?