Тошкент шаҳри ва Фарғона вилоятида гиёҳвандлик воситалари савдоси билан шуғулланган шахслар қўлга олинди. Улардан жами 10 литрдан ортиқ “гашиш” ёғи, “опий“ ҳамда “гашиш” моддалари аниқланиб, 51 минг дозага тенг наркотик воситаларнинг ноқонуний айланишига чек қўйилди. Бу ҳақда Ички ишлар вазирлиги хабар берди.

Маълум бўлишича, 1994 йилда туғилган шахс интернет орқали фаолият юритувчи норко-дўконда бир йил давомида “омборчи” сифатида ишлаб келган. Гумонланувчининг яшаш хонадони кўздан кечирилганда, 49 та махсус пробиркага жойланган 1 литрдан ортиқ “гашиш” ёғи, шунингдек, бешта идишда сақланган 9 литрдан ортиқ “гашиш” ёғи ҳамда 10 грамм “опий” гиёҳвандлик воситаси аниқланган.

Бундан ташқари, унинг уйидан 35 минг АҚШ доллари, еттита банк пластик картаси, 20 та SIM-карта, электрон тарози ва хизмат гувоҳномаси топилиб, ашёвий далил сифатида расмийлаштирилган.

Ўтказилган тадбирлар натижасида 51 минг дозага тенг бўлган 10 литрдан ортиқ “гашиш” ёғи ва 10 грамм “опий” гиёҳвандлик воситаларининг ноқонуний айланмаси ҳамда тарқалишининг олди олинган.

Шунингдек, Фарғона вилоятининг Қўқон шаҳрида ўтказилган тезкор тадбир давомида 1985 йилда туғилган аёл гиёҳвандлик воситасини сотаётган вақтида ушланган. У харидорга 40 грамм гашиш гиёҳвандлик воситасини сотиш вақтида қўлга олинган. Аёлга тегишли сумка кўздан кечирилганда эса қўшимча 60 грамм гашиш топилган.

Қайд этилишича, ушбу аёл аввал ҳам Жиноят кодексининг 273-моддаси (гиёҳвандлик воситаларини, психотроп моддаларни ёки уларнинг аналогларини ўтказиш мақсадида қонунга хилоф равишда тайёрлаш, қайта ишлаш, олиш, сақлаш ва бошқа ҳаракатларни амалга ошириш, шунингдек уларни ноқонуний ўтказиш) билан судланган. Бироқ у содир этган қилмишидан хулоса чиқармасдан, жиноий фаолиятини давом эттирган.

Ҳозирда мазкур ҳолатлар юзасидан гумонланувчиларга нисбатан Жиноят кодексининг 273-моддаси билан жиноят ишлари қўзғатилган. Уларга нисбатан қамоқ эҳтиёт чораси қўлланилган, тергов ҳаракатлари давом этмоқда.

Эслатиб ўтамиз, аввалроқ Тошкент шаҳрида гиёҳвандлик воситалари савдоси билан шуғулланган хориж фуқаролари қўлга олинган эди.