“Халойиқ, уйғонайлик”. Ўзбек жамоатчилиги Соловёвнинг гапларига кескин жавоб қайтаришни талаб қилмоқда

Россиялик телебошловчи Владимир Соловёв Москвани Марказий Осиё ва Арманистонда Украинадаги каби “махсус ҳарбий амалиёт” ўтказишга чақирди. Воқеадан сўнг Россиянинг Арманистондаги элчиси Сергей Копиркин Арманистон Ташқи ишлар вазирлигига чақирилди ва Соловёвнинг баёнотлари юзасидан норозилик нотаси топширилди. Ўзбекистон ТИВ эса ҳамон сукут сақламоқда.

Соловёвнинг мазкур баёноти кўпчилик, шу жумладан, бутун Марказий Осиё ва Арманистон аҳолиси томонидан кескин қабул қилинди. Жамоат фаоллари ўз муносабатларини билдириш билан бирга, бирлашган ҳолда норозилик нотаси юбориш зарурлигини таъкидламоқда.
“Юксалиш” умуммиллий ҳаракат раиси, Қонунчилик палатаси депутати Бобур Бекмуродов Соловёвнинг гапларига тупуриб қўйиш етарли эканини қайд этди.

“Халқаро ҳуқуққа тупуришни таклиф қилган бу нусха минтақамизни ўзининг империяча доктриналарига киритишни таклиф қилибди. Замон ўзгарди. Халқлар тақдири телестудиялардаги бақир-чақирлар ёки “катта оғалар”нинг кўрсатмаси билан ҳал қилинадиган даврлар тарих ахлатхонасига кетганига анча бўлди. Сарҳадларимиз — бизнинг ор-номусимиз. Мустақиллигимизга бўлган ҳар қандай таҳдид “итоаткорлик” билан эмас, миллатимизнинг бирдамликдаги қатъий зарбаси билан қарши олинади. Бундай провокациялар фақат ва фақат қўшниларни душманга айлантиради. Бизда ўз уйимизни ҳимоя қилиш учун ирода ҳам, ресурс ҳам, жасорат ҳам етарли!”, деди у.

Депутат сўнгсўз ўрнида “мустақиллигимиз абадий бўлишини тилаб”, МОнинг беш давлати байроқларини жойлади.
Иқтисодчи Отабек Бакиров унинг сўзларини қиморбозлардан калтак еб, афти мажақланган муштумзўр аламини тинч кетаётганлардан олаётганга ўхшатди.

“Сурия ва Венесуэладан тепилганларнинг пропагандачиси минтақамизга таҳдид қиляпти. Бу худди қиморбозлардан калтак еб, афти мажақланган муштумзўр ўз йўлида тинч кетаётганларга дағдаға қилишига ўхшайди... Бу моховлар уч кун қор ёғганди, қорини курай олишмай ётишибди. Дағдағасига ўласанми? Ўзинг ҳар йили миллион уруғинг қуриб ахлатингга ботаётган бўлсанг, ҳар йили 2 миллионга ўсаётган 85 миллионлик Марказий Осиёга дўқ уришингга бало борми?”, деди у.

“Нима бўлгандаям бундай пўписа баёнотларни жавобсиз қолдирмаслик керак” деган фикрда. “Марказий Осиё давлатлари биргаликда нота бериш керак камида. Ягона позицияда эканимизни кўрсатиш керак, дея таъкидлади Бакиров.

Ўзбекистон Миллий ахборот агентлиги бош директорининг биринчи ўринбосари, ҳуқуқшунос Хушнудбек Худойбердиевнинг фикрича, бу фикр катта эҳтимол билан Кремлда ёпиқ эшиклар ортида муҳокама қилинган.
“Аслида-ку Соловёв каби эсини еган аҳмоқларнинг гапи эътибор беришга ҳам арзимайди. Лекин бошқа жиҳати бор. Россия тактикаси шунақа, ҳукумат хоҳлаётган гапларни қўштирноқ ичидаги жамоат фаоллари тилидан айттиришади. Яъни бу тасодифан айтилган гаплар эмас, Кремлда ёпиқ эшиклар ортида муҳокама қилинган ва кейин пастга туширилган тезислар бўлиш эҳтимоли катта. Бу орқали Россия ҳукумати жамоатчилик реакциясини кузатади, жа дўппи тор келса, бу ўзининг шахсий фикри, бизга алоқаси йўқ, деган шаблон гап билан қутилади”, дея тушунтирди у.

Ҳуқуқшунос шунингдек, Ўзбекистоннинг конституциявий тузуми ва суверенитетига қарши гапирган хорижликларни нима учун “персона нон грата” деб эълон қилмаслигимиз керак, деган савол билан юзланди.

“Ташқи ишлар вазирлиги бу борада алоҳида баёнот бериши, Россия элчисини зудлик билан чақиртириши ва Соловёв фикрларига изоҳ талаб қилиши керак. Фақат ўтган сафар Захар Прилепиннинг гапидан кейин рус элчисини ‘таклиф қилганимиз’ каби шарманда бўлмайлик. Элчилар бунақа ҳолатда таклиф қилинмайди, чақиртирилади!”, дея эслатиб ўтди у.

“Уйғонайлик, халойиқ, уйғонайлик! Кўзимизни каттароқ очайлик. Ватанимиз мустақиллигини ҳимоя қилиш учун ақлимизни ишлатайлик. Агар ҳозир ақлимизни ишлатмасак, эртага Ватан ҳимояси учун қурол ишлатишга мажбур бўлиб қоламиз”, деди Хушнудбек Худойбердиев.