АҚШ ҳарбийлари ўтган тунда Эронга қарши навбатдаги ҳужумларини якунлади ва шу тариқа, Америка томонидан амалга оширилган кетма-кет ҳаво зарбалари 11-кечага етди. Бу ҳақда бугун, 22 июль куни АҚШ Марказий қўмондонлиги (CENTCOM) маълум қилди.

Баёнотга кўра, ҳужумлар давомида Эроннинг ҳарбий операциялар марказлари, денгиз имкониятлари, авиация ангарлари, дронлар сақланадиган омборлар ҳамда ҳарбий логистика инфратузилмаси нишонга олинган. Шунингдек, бу зарбалар Ҳормуз бўғози орқали ҳаракатланувчи тижорат кемаларига таҳдид солиш имкониятини янада чеклашга қаратилган.

АҚШ ҳарбийларининг маълумотига кўра, ҳужумлар кеча, 21 июль куни кечқурун тахминан 75 дақиқа давом этган. Вашингтон сўнгги уч ой ичида Эрон Ҳормуз бўғозидан ўтаётган 30 дан ортиқ тижорат кемасига ҳужум қилганини билдирган.

Эрон Соғлиқни сақлаш вазирлиги вакили маълум қилишича, АҚШнинг сўнгги зарбалари оқибатида 50 нафар тинч аҳоли ҳалок бўлган, 500 киши яраланган. Сўнгги кунларда урушда ҳалок бўлган АҚШ ҳарбийлари сони эса 18 нафарга етган.

Ўтган ҳафта АҚШ Президенти Дональд Трамп дам олиш кунларида америкалик ҳарбийлар ҳалок бўлганидан кейин Эрондан қасос олишга ваъда берган. Сўнгги бир ҳафта ичида Трамп Эронда нишонга олинаётган объектлар рўйхатини энергетика иншоотлари ва кўприклар ҳисобига кенгайтириш билан таҳдид қилиб келди. 

Маълумот ўрнида, 1949 йилги Женева конвенциялари уруш пайтида аҳолининг ҳаёти учун муҳим ҳисобланган фуқаролик объектларига ҳужум қилишни тақиқлайди. Халқаро ҳуқуқ бўйича америкалик экспертлар Трампнинг бундай объектларга зарба бериш ҳақидаги аввалги таҳдидлари халқаро ҳуқуқ нуқтаи назаридан ҳарбий жиноят сифатида баҳоланиши мумкинлигини билдирган.

Қайд этиш жоизки, уруш давомида АҚШ ва Исроилнинг Эронга, шунингдек, Исроилнинг Ливанга берган ҳужумлари оқибатида минглаб одамлар ҳалок бўлган ва миллионлаб киши ўз уйини тарк этишга мажбур бўлди. Можаро нефть нархларининг ошишига ва жаҳон молия бозорларида беқарорликка сабаб бўлди.

Эслатиб ўтамиз, аввалроқ АҚШ Эрон билан катта урушга тайёргарлик кўраётгани айтилганди.