Indoneziya şarqiy sohillari yaqinida 7,7 magnitudali zilzila va önlab takroriy silkinişlar sodir bölib, kamida 2 kişi halok böldi. Bu haqda “Reuters” xabar berdi.

Malum qilinişiça, zilzila bugun, 15 avgust kuni ertalab sodir bölgan. Janubi-Şarqiy Osiyo mamlakatida bir neçta hududda balandligi 1 metrdan kam tsunami tölqinlari qayd etilgan, zilziladan taxminan uç soat ötib tsunami xavfi haqidagi ogohlantiriş bekor qilingan.

Tabiiy ofatlarni bartaraf etiş milliy agentligiga (BNPB) köra, halok bölgan ikki kişidan taşqari, Sikka okrugida yana bir kişi jarohatlangan.

BNPB'ning qayd etişiça, Şarqiy Nusa-Tenggara, Ğarbiy Nusa-Tenggara va Janubiy Sulavesi hududlarining ayrim qismlarida kuçli silkiniş sezilgan. Bir neçta hudud aholisi zilzila taxminan bir daqiqa davom etganini bildirgan.

“Aholining aksariyati silkinişni his qildi va uylaridan taşqariga tarqalib çiqdi”, deyiladi agentlik bayonotida.

Şarqiy Nusa-Tenggara provintsiyasidagi Ende okrugida joylaşgan şifoxona bemorlarni taşqariga olib çiqqani Kompas TV tasvirlarida körsatilgan. Kompas.com esa kamida bir joyda köçki sodir bölganini xabar qilgan.

Geofizika agentligi (BMKG) birinçi zilzilani soat 04:58 da (Grinviç vaqti bilan 21:58) 15 kilometr çuqurlikda qayd etgan. Şundan keyin bir neçta takroriy silkinişlar sodir bölgan.

Avstraliyaning tsunami ogohlantiriş markazi suv ostidagi zilzila Avstraliya materigi, orollari yoki hududlari uçun “tsunami xavfini keltirib çiqarmasligi”ni malum qilgan.

Eslatib ötamiz, joriy yilning 10 avgust kuni Kolumbiyaning ğarbiy hududlarida yuz bergan kuçli zilzila oqibatida halok bölganlar soni 250 nafardan oşgani xabar qilingandi.