“Ихтиёрий топширилган ўқотар қурол эгалари жавобгарликдан озод қилинади”
 
Ўзбекистон Республикаси Жиноят кодексининг 248-моддасига кўра тегишли рухсатномасиз ўқотар қурол, ўқ-дорилар, портловчи моддалар ёки портлатиш қурилмаларини тайёрлаш, олиш, олиб юриш, сақлаш, олиб ўтиш ёки жўнатиш ҳаракатларини содир қилган шахсларга нисбатан (қурол, ўқ-дорилар, портловчи моддалар ёки портлатиш қурилмаларига қонунга хилоф равишда эгалик қилиш) жиноий жавобгарлик белгиланган.

Таъкидлаш лозимки, Жиноят кодексининг 248-моддаси 4-қисмида ўқотар қурол, ўқ-дориларни, портловчи  моддалар ёки портлатиш қурилмаларини ўз ихтиёри билан топширган шахслар жавобгарликдан озод этилиши кўрсатилган.

Шунингдек, 2022 йилнинг 31 май куни “Қурол тўғрисидаги” Қонун такомиллаштирилиши ҳамда 2022 йил 2 сентябрь кунидан ушбу қонуннинг янги таҳрири кучга кириши муносабати билан эндиликда калта стволли пневматик, газли, травматик тўппончалар таъқиқланганлиги, узун стволли пневматик қуроллар муомаласи ов қуролига тенглаштирилган. 

Ушбу даврдан ҳозиргача вилоятда истиқомат қилувчи пневматик қурол эгалари томонидан ушбу қуролларни ҳужжатлаштириб олиш ёки бўлмаса ихтиёрий равишда ҳуқуқ-тартибот идораларига топшириш ишлари амалга оширилиб келинмоқда.

Бироқ, айрим фуқаролар ўзида мавжуд бўлган ҳужжатсиз пневматик қуролларни ҳужжатлаштирмасдан ёки бўлмаса ҳуқуқ-тартибот идораларига топширмасдан ўзларининг яшаш хонадонида ноқонуний равишда сақлаб келишмоқда. 

Бу эса, келгусида мазкур қуроллар ёрдамида турли хил жиноятлар ёки кўнгилсиз ходисаларни юзага келишига замин яратиши мумкин.
Ҳурматли фуқаролар агарда сизларнинг яшаш хонадонингизда ҳам ҳеч қандай ҳужжатларга эга бўлмаган ўқотар ов қуроллари, ўқ-дорилар, пневматик қуроллар сақланиб қолган бўлса, уларни ихтиёрий равишда ҳуқуқ-тартиботидораларига топширсангиз жиноий ва маъмурий жавобгарликдан озод этилишингизни маълум қиламиз.